សហរដ្ឋអាមេរិក៖ បេក្ខជនប្រធានាធិបតីអាមេរិកមកពីគណបក្សប្រជាធិបតេយ្យ លោកស្រី Kamala Harris កាលពីថ្ងៃអង្គារម្សិលមិញបានអំពាវនាវឱ្យបញ្ចប់សង្គ្រាមអ៊ីស្រាអែល និងក្រុមហាម៉ាសក្នុងតំបន់ហ្គាហ្សា ដោយលោកស្រីនិយាយថា អ៊ីស្រាអែលមិនត្រូវចូលឈ្លានពាន និងកាន់កាប់លើទឹកដីប៉ាឡេស្ទីនសាជាថ្មីម្តងទៀតទេ នៅពេលដែលសង្គ្រាមដែលអូសបន្លាយពេលជាងមួយឆ្នាំនេះត្រូវបានបញ្ចប់។ 

ថ្លែងនៅទីក្រុង Philadelphia ទៅកាន់សមាគមជាតិនៃអ្នកកាសែតស្បែកខ្មៅ លោកស្រី Harris បានអំពាវនាវឱ្យមានបទឈប់បាញ់រវាងអ៊ីស្រាអែល និងក្រុមសកម្មប្រយុទ្ធហាម៉ាស-ប៉ាឡេស្ទីន ក៏ដូចជាដំណោះស្រាយរដ្ឋពីរ (Two-state solution) និងជាវិធីសាស្រ្តដែលអាចរក្សាស្ថិរភាពនៅតំបន់មជ្ឈិមបូព៌ា និងមិនមែនជាការផ្តល់អំណាចឱ្យទៅកាន់ប្រទេសអ៊ីរ៉ង់។  

ឆ្លើយតបទៅនឹងសំណួរដែលសួរដោយអ្នកកាសែតចំនួន ៣នាក់ លោកស្រី Harris ថ្លែងថា៖ "យើងបានបញ្ជាក់យ៉ាងច្បាស់ណាស់ថា កិច្ចព្រមព្រៀងនេះត្រូវតែសម្រេចបានក្នុងគោលបំណងដែលល្អបំផុតសម្រាប់មនុស្សគ្រប់គ្នានៅក្នុងតំបន់"។ បើតាមក្រសួងសុខាភិបាលនៃតំបន់ហ្គាហ្សាអះអាងថា សង្គ្រាមដែលបានផ្ទុះឡើងតាំងពីថ្ងៃទី០៧ ខែតុលាឆ្នាំមុន បានផ្តាច់ជីវិតមនុស្សប្រមាណជា ៤ម៉ឺននាក់ និងមានមនុស្សជិត ១០ម៉ឺននាក់ផ្សេងទៀតបានរងរបួស៕